بسم الله الرحمن الرحيم
الثقة شعور ، شعور لو حسيت به او بتحس به عموماً فهو شعور جميل جدا ، صدرك يتنفخ ، راسك تعلى ، تحط رجل على رجل كده و تبقى برنس في نفسك و ماحدش هامك ، و لو مابتحسش به فانت غالبا بتعمل الحاجة و انت متردد جدا و لو اي حد بس من بعيد شكك في نفسك هتخضعله و تفقد الثقة الوهمية اللي مش موجودة اصلاً.
الناس نوعين واحد واثق من نفسه و واحد مهتز و اكيد الاتنين مش كده على طول كل واحد ممكن يفقد الثقة في نفسة نتيجة اي ضغوط او عوامل خارجية بس لو الصفة فيك اصلا بترجعلها بسرعة ، و من هنا يبدأ الكلام عن العوامل الخارجية و دي مهمة جدا طبعا.
الثقة بالنفس مش صفة بتتولد بها او بتتطعم بها ، دي صفة مكتسبة نتيجة تربية او بمعنى اصح نتيجة عوامل البيئة المحيطة بالانسان ، يعني انت لو من صغرك متربي انك تعتمد على نفسك ، اهلك بيحملوك جزء من المسؤلية و بتزيد مع نضجك اكيد هتختلف كتير عن اللي بيتعامل انه مهما كبر صغير و انه فاشل و مش هينجح ابدا مهما عمل ، الكلام ده على الصعيد الاسري لكن لو خرجنا شوية للناس اللي بنتعامل معاها عموما فمش كل الناس بتتمنالك الخير يعني اكيد في اللي بيغير من ثقتك دي و ممكن يعمل اي حاجة علشان يهزها.
نرجع للعنوان "نطة ثقة" هي عبارة عن نطة كده بينطوها اللي بيقدموا في الكليات العسكرية مش عارف بتبقى على ارتفاع كام كده بس انت بتتحط في اختبار انك تنط منه في المياه ، و هو معمول على اساس يقيس مدى ثقتك في نفسك و شجاعتك ، بس انا عموما مش مقتنع به تمام لأن مش شرط يعبر عن ثقة بالنفس ، انا اعرف واحد نطها و هو مغمض عينه و بيقول الشهادتين بس علشان مايزعلش ابوه.
الثقة شعور جميل جدا ربنا ينعم به علينا كفاية نشوة الانتصار و الفرح اللي بتحس به لما تثبت لأي حد حاول يفقدك ثقتك في نفسك انه حمار و مابيفهمش حاجة.
