بسم الله الرحمن الرحيم
في الحقيقة الموضوع ده صعب ان انا اتكلم فيه و ده لأنه مش واضح او بمعنى اصح في ناس كتير عاشت و ماتت و ماعرفتش توصل لحقيقته او تعريف كامل من وجهة نظرها .
الحياة من وجهة نظري و هي : مواقف ، اشخاص ، معتقدات ، ومهما كانت تسمية اي حاجة بتحصل فيها مابتخرجش عن ال3 دول ، وكلهم معتمدين على بعض و مشاكلهم مرتبطه ببعض و حلها كمان مرتبط ببعض .
معتقد كون فكرك اللي تقدر تتعامل به مع الاشخاص عن طريق المواقف " الاحداث " و مش مقصود بالمعتقد هنا المعتقد الديني بس انما اي معتقد : ديني ، سياسي ، فكري … و من هنا ييجي الاختلاف .
فرق كبير بين الحياة " life " و المعيشة " living " … المعيشة هي ازاي تعيش يعني ازاي تشتغل علشان تجيب فلوس و تعرف تاكل و تلبس و تنام مستريح ، لكن الحياه هي انك تقوم بالشئ اللي اتخلقت علشانه مستعين بال3 حاجات اللي اتكلمت عنهم فوق .
و من هنا ثبت عندي رأي او تقدر تطلق عليه " معتقد " ان الموت نوعين : موت "حقيقي" و هو الموت اللي فيه روحك بتفارق جسمك و تدفن و تروح تشوف عملت ايه بقى و تتحاسب عليه ،، و موت "روحي" و هو انك تكون " عايش و مش عايش" بتاكل و تشرب و تنام بس "ميت" و ده لأنك ماعندكش هدف واضح تسعى اليه ، مافكرتش تضيف حاجه جديدة او حتى تقوم بوظيفتك اللي اتخلقت علشانها على اكمل وجهه .
في مقولة ل Winston Churchill بيقول فيها “We make a living by what we get, but we make a life by what we give.” … انا في الحقيقة مش حابب اعلق عليها و هسيبلك الحرية في التفكير و استنتاج قصده منها بس اللي انا متأكد منه اننا اكيد هنختلف في معرفة قصده منها .
سواء اتفقت معايا في وجهة نظري عن الحياة او لأ ده مش هيفرق كتير لأن الاختلاف في وجهات النظر عن الحياة عموما بيدور كله في حلقه واحده بنبعد عن بعض شوية لكن في الاول و الآخر كله في حلقه و احده و كله هيوصل لنفس التعريف او وجهة النظر .
في النهاية تقدروا تسموها ملاحظة ، overthinking او حتى سرحان بس المهم انها شغلت بالي و لو حتى لفترة قصيرة ، سلام عليكم .
