بسم الله الرحمن الرحيم
بعد غياب اكتر من شهرين رجعت اوجعلكوا دماغكوا تاني بس الموضوع المره دي غريب شويه او مش غريب هو شعور و اي حاجة بتتحس بيبقى صعب الكلام عنها .
في لحظه من لحظات السرحان و التفكير الزائد عن الحد في احوال مصر مؤخرا *مؤخرا دي اللي هي مثلا بتاع آخر عشر سنين مثلا* توصلت ان من ضمن اسباب كتير للي وصلنا له هو الحرمان .
فتحت اللاب توب بتاعي_ بايظ و بيحتضر و الله لو لميتوا من بعضكوا و جيبتولي واحد جديد ابقى شاكر جدا :D _ ، المهم و كالعادة جوجل مابيردش سائل كتبت "تعريف الحرمان" المهم توصلت للصفحه دي تقدروا تدخلوا عليها : http://ejabat.google.com/ejabat/thread?tid=44c2017efbb16870 ، من اجابات الناس اتأكدت من اكتر معتقد عندي فبرغم الاختلاف في تعريفهم للحرمان اجمعوا انه شعور بالنقص بس كل واحد قال اللي ناقصه هو بس .
مش هعيد الاحداث اللي حصلت في البلد و لا هعمل نفسي محلل سياسي او نفسي بس لو بصينا كده من الاول حتى قيام الثوره الناس كانت نازله تطالب بـ "عيش .. حرية .. عدالة اجتماعية " و ده كان ناتج من حرمانهم من الحاجات دي .
لو رجعنا برده لتصرفات الاخوان من بعد ثورة 25 يناير الا ثورة 30 يونيو _ انا قولت ثورة اهو الامر مايسلمش برده _ نقدر نقول حرصهم على السلطه و اقصاء اي حد عنها ناتج عن حرمانهم برده قعدوا بتاع سبعتلاف سنه هما كمان تحت الارض بيتعذبوا و هيموتوا و يحكموا .
لو رجعنا بقى للي بعض الناس بتعمله مع الجيش "تطبيل" بعد الثورتين برده ناتج من الحرمان بس هنا يختلف الناس في تفسيره ، شوية يقولولك اه محرومين من الامن و الامان و الجيش هيحققلهم ده ، و شوية هيقولك محرومين من لحس البياده و العبوديه ، المهم انهم محرومين و خلاص .
الامر طبعا ماينتهيش لحد الانواع دي من الحرمان ، في نوعين خِطرين و نتائجهم مش ظريفة و هم الحرمان من الاكل و هنا ييجي المصطلح اللي بكرهه "ثورة الجياع" و النوع التاني الحرمان العاطفي و ده مش هتكلم عنه :D
و الاهم من كل ده هو الحرمان من رحمة الله .. اللهم لا تحرمنا من رحمتك ،،
انا عارف اني طولت ، مع ان الموضوع كبير و محتاج
كلام كتير بس ده اللي عندي و السلام عليكم :)
